小胖台灣麵 (已結業)

星期六行經元朗千色匯，Lunch時間呢間「小胖台灣麵」門口有好多人拎完飛等入座。估計應該有啲料到，所以我都拎左飛等待入去試下。點知···大家必吃嘅鬥志高漲，拎左飛嘅人真係死守門口，我最後排左廿幾分鐘先入到去食😂滷肉濃白湯麵 $79奶白色嘅湯底肉味好出，舖面嘅滷肉肉碎帶黎台式嘅感覺。我仲加左4款餸連大大杯凍珍珠奶茶，埋單只係79蚊！竹笙、蜂巢豆腐、台灣蛋餃加皮蛋，味道清香。呢個價錢食到咁好美又足料嘅台灣麵，真係好抵🤩招牌三寶牛肉麵 $96呢碗招牌麵真係要大推👍🏻 有金錢肚、牛筋同牛腩。份量好多！食到最尾麵底清完都仲有好多餸剩。牛筋煮得好腍，入口有彈滑嘅筋位；牛腩鮮嫩軟滑，加埋甜中帶紅燒微辣嘅湯底，配上有咬口嘅油麵，唔怪得見有好多食客都叫呢碗麵食啦😋我仲叫左杯凍珍珠烏龍奶茶 $14，茶味好出好好飲。小食嘅酥炸和風牛蒡條 $32，都係驚喜發現，裹粉脆薄，裏面嘅長粗條牛蒡好新鮮，有種接近薯仔嘅口感，帶有油炸過嘅甘香，食唔停口！呢餐真係食得又香又大份！食完我就明白點解千色匯附近咁多食肆，咁多人寧願繼續喺呢間麵店外排隊等開餐！