泰濃麵 (樂道)

營業中

休息中

屋企附近最近開咗間船麵店，一直未有機會試，但就令我留意多咗，發現原來有唔少餐廳做船麵，同朋友行經呢間喺尖沙咀嘅船麵店，佢推薦話之前食過印象唔錯。食物主打泰式湯粉麵，配料可以揀牛肉、豚肉、雞肉同海鮮，仲有五款麵底同三款湯底。除咗主食之外，亦有少量小食同飲品可以選擇。冬陰功湯金邊粉一上枱已經香氣撲鼻，份量唔少，冬陰功湯底夠濃郁，而且配菜都幾多。配菜有鮮蝦、青口、蟹柳、秋葵同秀珍菇，相當豐富。我揀嘅頂級美國肥牛質素唔錯，肥瘦均勻，上枱嘅時候半生熟，輕輕將牛肉浸落湯到就食得，肉質軟腍，牛味濃郁。朋友揀嘅安格斯牛肉我亦試咗一塊，果然係更優質，油花綿密，入口油香更重，貴廿蚊亦係值得。小食拼盤有齊三款小食，分別係泰式炸蝦餅、炸雞翼同炸芝士雲呑，每款兩件，兩個人分享剛剛好。最欣賞炸蝦餅，新鮮彈牙，外層炸得香脆但一啲油膩感都冇。炸芝士雲吞好特別，香脆嘅外皮包住香噴噴嘅芝士，芝士味道唔算好濃，但恰到好處，趁熱食仲有拉絲效果。蝶豆花特飲味道清甜，加上青檸檬更加清新。餐廳食物選擇雖然唔算多，但勝在變化多，濃郁嘅湯頭配上唔同級數嘅食材，有平有貴，俾客人自己選擇，價錢亦非常合理。