十下火鍋

終於去咗抵食又好味嘅人氣火鍋店--十下火鍋，長期爆滿，大家要食就要提前book定位啦☺️非常推介佢嘅二人餐，款式多，勁足料，真係好抵食，連湯底都可以揀鴛鴦鍋，必定要試佢嘅十下麻辣鍋，唔算好辣，但越食越香，而且入面有鴨血同凍豆腐，好好味😋另外叫咗木瓜蕃茄鮮魚湯，真係有半條魚係入面，真材實料👍🏻套餐仲包大刀手切本地牛頸脊，肉質嫩滑又有牛味，當日覺得最好味嘅就係佢🤤而且份量都唔少，就算唔揀套餐，都一定要叫一份食呀。肉類仲有花雕醉雞，酒味唔會好濃不過肉質好嫩。個人認為套餐第二好味嘅係十下三寶滑，除咗蝦滑同墨魚滑，仲有好特別嘅發財蠔豉牛筋滑，三樣我都鍾意。而鳳城水餃都非常出色，入面嘅蝦勁彈牙。丸類都好豐富，有好香嘅陳皮魚蛋同埋真係爆漿嘅貢丸。食到呢度已經好飽啦，但套餐仲有炸響鈴，同埋好豐富嘅蔬菜拼盤，兩個人根本冇可能食得晒，仲有飲品可以揀一大扎嘅洛神花茶，好解渴👍🏻