米走雞 (渣甸中心)

營業中

休息中

同阿媽去完菜市場買完餸，啱啱好係午餐時間。我就帶阿媽嚟呢度食火鍋。呢度環境好舒服，好乾淨，一入門口就開始期待等陣食飯。我哋嗰陣點咗麻辣雞煲，一上枱就刺激到我哋嘅味蕾，搞到我哋口水直流，湯汁嘅辣味啱啱好。鍋底非常濃郁又唔油膩。入面嘅雞肉都好正，外皮微微焦脆，肉質仲保持住嫩滑嘅口感。因為阿媽鍾意羊肉，就點咗佢哋嘅蒙古羊肉片，刀工好犀利，切得好薄，放入去滾一下，立刻係粉嫩嘅色澤。羊肉入口嫩滑，又有咬勁，真係好味！跟住仲有日本鮮帶子，肉質飽滿，味道鮮甜，口感彈牙，喺麻辣湯底滾咗之後，每一粒帶子都有一絲麻辣嘅余味，太好食啦。佢哋嘅手打豬肉丸，鮮嫩多汁，肉香四溢，仲好有彈性，咬開之後仲可以感受到濃郁嘅湯汁喺口中蔓延。呢餐之後，我哋仲點咗杯竹蔗茅根飲料。非常清爽，尤其食完麻辣雞煲之後飲，真係好過癮。我同阿媽都食得非常滿足，今日嘅麻辣火鍋實在係過癮。下次可以同我嗰啲鍾意食麻辣嘅好姐妹一齊嚟食。