慈素小聚

營業中

休息中

今日去咗尖沙咀一間素食餐廳慈素小聚，呢度嘅環境真係好舒服，裝修簡約得嚟又有屋企嘅感覺，仲配埋輕鬆嘅音樂，令成個用餐過程好chill。佢哋嘅素食選擇真係超多，今次試咗六款，推介幾款俾大家。首先嚟個椒鹽白靈芝菇，呢個真係一大驚喜！外層炸得香脆，但入面嘅菇仍然保持住Juicy嘅口感，仲帶少少辣味，食落真係一舊接一舊，停唔到口。第二推介嘅係翡翠生菜包，生菜好新鮮，配埋入面爽脆嘅沙葛餡料，口感層次好豐富，清爽又好味。跟住試咗雙色厚切多士，一邊係芒椰味，一邊係香芋味。香芋嗰邊香滑，仲加咗杏仁片，食落好有層次；芒椰味就酸酸甜甜，清新唔膩，兩種口味都好正。另外叫咗碗椰汁雪耳無花果燉湯，湯底清甜滋潤，飲完即刻覺得好舒服，仲好解膩。再嚟一個忌廉蘑菇濃湯佐菠菜苗，蘑菇湯好香濃，菠菜苗啱啱好帶出咗清新嘅口感，成個湯飲落去好滑，完全冇渣。最後係素食串燒配秘制沙嗲醬，入面有肉丸同素雞粒，肉丸竟然有少少似魚嘅味道，而素雞粒咬落仲有絲狀嘅質感，加上沙嗲醬真係好惹味，作為開胃菜一流。