四季燒臘茶餐廳

營業中

休息中

去元朗探朋友，順便去買老婆餅，食埋tea先返歸，原本諗住去某沙牛麪聞名既茶記，可惜人太多，就轉去附近搵間食飽算。附近幾間都滿座（疫情下，幾乎都一張枱一人），行遠少少只有呢間有位，是但，坐低先講。一入門口已經聞到陣異味，唔強烈，但就係聞到，都入到嚟，就試下。點咗個下午茶排骨炒河，加凍檸茶盛惠 40大元，唔貴。坐咗大約十分鐘就上齊。排骨炒河色水麻麻，好淡色，食落排骨鬆散，好似雪咗好耐又重料醃過，河粉碎散，味道偏淡，重油味，排骨以外仲有雞蛋，無咩特別味，但乾炒河粉加蛋比較少見。下午茶關係，份量偏小，同價錢成比例。檸檬茶無少甜…唉，香港茶餐廳通病。今餐麻麻地，唔太差亦唔係好。但我想講呢間店既店員，好似對疫情無咩感覺。入店無主動叫你探熱，無掃安心出行。但最嚴重既係，水吧，廚房，侍應都比我見到唔戴口罩對食物吹水，外賣員由店頭走到店尾一直大大聲講嘢都無戴口罩，而同時一堆堆煮好既滷水就咁放系度，平時我都覺得唔衛生，何況而家疫情。呢間店睇名似主打燒臘，臨出門見到門口有個食客食緊叉雞飯，賣相十分好又大碟，可惜我應該唔會再嚟試了。