哥登堡餐廳

營業中

休息中

十多年前去過哥登堡，唔記得食乜，淨係記得食完之後同女朋友過左一個肚痾既晚上．．．今晚舊地重遊．．．門口冇乜變，裡面光猛左，多左兩部電視，少左格仔枱布，冇左皮造既Menu．．．傳統老西既格調都冇埋！唉！四個人去，叫左T骨，牛仔骨，什扒同吉列豬扒；先嚟餐湯，味道好港式紅湯白湯，叫做過得去；再上鐵板，T骨要五成熟變八成熟，冇肉汁冇口感，但尚算有牛肉味；牛仔骨超級腍，掂一掂就離晒骨，冇左輪骨既樂趣；什扒塊豬排鞋口，煙肉太乾，腸仔皺皮，雞翼冇味，牛扒好似一般午餐貨式，驚喜係加左個什扒餐中久違了既荷包蛋。吉列豬扒唔夠鬆，但算OK。到餐飲，茶底太耐冇換，攪到檸茶同奶茶好澀！紅豆冰唔係用刨冰，而且稀到水汪汪！雖然話五六十蚊個餐，唔可以太苛求，但係咁既質素真係令人好失望！仲有，D侍應顧住睇無記新劇賭場風雲．．．唉！雖然aged（簡單黎講係屠宰後放入冷藏櫃十零日，等牛扒本身既酵素發酵，令肉質變嫩）既牛扒要響高級扒房先食到，但大部份港人食到好腍既牛扒就話好味好正，攪到D餐廳用盡方法整腍D牛扒，攪到冇晒牛肉味，食到既味只係醬汁！平有平吃，咁樣好似浪費左．．．