滾得囍宮廷火鍋小炒 (已改名) 查看

人多食飯揀餐廳，打邊爐一定係首選，呢間火鍋店最近新推一人鍋，有人要食辣，有人想要清湯，依家就算同一大班friend食都可以揀個自己鍾意嘅湯底，衛生之餘又唔怕唔啱口味。餐廳行宮廷路線，無論係裝潢或者食物擺盤都好正。鍋物有好多選擇，酸菜魚、雞、卜卜蜆、麻辣鴨血、牛骨等，私心推介藥膳麻油雞，淡淡香氣，唔油膩，雞肉超嫩且入味，令人一試難忘、椰子雞都唔錯，清甜可口，各有千秋。肉類有本地手切牛肉，入口嫩滑，牛味突出，淥幾秒就食得。大力推介黃金響鈴，即叫即整，沙沙口感，鹹蛋香氣四溢，建議一上枱就食。手打黑松露野菌鮮蝦丸同紫皇蟹粉豚肉餃出面比較少見，前者偏軟身，淡淡黑松露香，後者餡料飽滿。雜菜拼盤份量十足，集合多款新鮮蔬菜，感覺健康。