姚姚酸菜魚 (港威商場)

營業中

休息中

今次再次幫襯呢間餐廳係因為佢出咗個雞煲二食套餐，鍾意打邊爐嘅我就試吓佢哋啲新嘢先！我比較鍾情尖沙咀分店，整體感覺都比較舒服，而且唔會有太壓迫嘅感覺，枱與枱之間有一定嘅距離，而且服務人員反應快，唔需要等好耐就會跟進你嘅需要！首先佢個雞煲有唔同嘅菇菌類，有冬菇片，秀珍菇，金菇，竹筍，雲耳，無論喺視覺上嘅五顏六色同味道都好豐富，我哋揀選咗少辣，而且佢隻雞煮得幾滑，唔會令到肉質好乾，啱啱好就上枱！呢個時候同時點咗佢嘅臘味炒飯，佢嘅炒飯粒粒分明，唔會太油，雞肉配上炒飯一流，額外惹味，個雞煲食到咁上下就可以叫佢加湯，佢會上埋二食火鍋嘅配料，配料架擺放炸雞皮，雞片，雞雜，雞塊，田園蔬菜（金菇，娃娃菜，蓮藕片，萵筍，豆腐卜）呢啲都係好掛汁既配料，假如配料唔夠，其實可以再order，整體嚟講，我覺得如果佢啲雞塊可以大少少，會有口感啲。最後叫多兩個甜品就大滿足，分別係姚姚脆奶同紅豆烏龍冰粉，脆奶外面就得鬆脆可口，入面奶味十足，唔會太甜，剛剛好，而紅豆烏龍冰粉就好清爽，食完濃味火鍋再食返清甜冰粉啱啱好中和返個味蕾，配料份量啱啱好！