彩福皇宴 (京瑞廣場1期)

營業中

休息中

今日去舅父嘅新屋，所以嚟到石門， 大約七點左右， 我哋去附近睇下有咩食， 見到京瑞廣場有一間彩福， 因上次喺其他彩福食個片皮鴨， 覺得幾正， 今次同舅父試下。酒樓裝修得幾豪華， 好適合婚宴和宴會， 見到出面仲有個平台， 平台既佈置適合舉行婚禮。基本推介嘅小菜都係以一啲健康食物為主，例如秋葵，黑蒜等。櫻花蝦xo醬花生苗露筍炒蝦鬆早一兩個星期前睇電視介紹花生苗， 見到呢度有得食， 所以叫嚟試下， 因為xo醬嘅關係 ，呢個菜有少少辣， 但只係微辣， 花生苗食落鮮甜爽口， 幾特別， 蝦鬆幾彈牙， 有用少少麻油調味， 味道唔錯。酥炸桶蠔桶蠔本身都幾肥， 個炸漿炸得好香脆， 食落去啖啖肉， 又唔會炸到蠔身過熟， 保存到蠔嘅鮮味。福建炒飯飯底炒得有鑊氣， 蝦肉係用大蝦切粒嚟炒， 幾彈牙， 其他材料有雞肉 ，冬菇 ，瑤柱絲， 菜粒， 紅蘿蔔等， 個芡汁唔會太傑或者太水， 食完個飯唔會水汪汪。片皮鴨一食同上次食果間分店既質素差不多，隻鴨都差唔多大隻，店員都在餐抬旁切片，大約有二十多片鴨肉，鴨皮燒得幾香，和甜醬，青瓜，香葱，麵皮夾住一起食，好滿足。