十侍 - 棉花糖A5和牛壽喜燒專門店

營業中

休息中

今日去咗旺角食十侍壽喜燒，係station 21搭電梯上1樓。店舖係日式風格，門口就有一個日本武士嘅擺設，裡面有5張四人枱，環境舒服。我地點咗壽喜燒(二人前)套餐，包括鹿兒島A5黑毛和牛西冷肉眼(360g)、自家製壽喜燒醬汁、季節野菜盛合、日本蘭王雞蛋2隻、讚岐烏冬同自家製雪糕。另外點咗2杯白桃乳酸梳打。店員會到每枱幫客人煮壽喜燒，先放好大塊嘅棉花糖入鍋再加上壽喜燒醬汁煮。平時會加入壽喜燒汁煮嘅糖用棉花糖代替，好有特式。之後加京蔥，就開始放入和牛煮。鹿兒島A5黑毛和牛有6塊，攤開好大塊，肉上嘅油花分配均勻，肥瘦勻稱，仲有埋證書。店員煮好和牛就放入已打散嘅雞蛋裡，和牛沾上蛋液，食落肉質嫩滑，味道好正。食完和牛，就開始煮野菜拼盤同讚岐烏冬，野菜同烏冬吸收哂壽喜燒汁，味道唔錯。食哂和牛同烏冬，仲有自家製雲呢拿雪糕，雲呢拿味道好濃，好食。