新匯聚餐廳小廚

營業中

休息中

前嗰一排因為爸爸整親隻手，唔方便煮飯，所以星期日我哋就一家人走咗出去食嘢啦，近近地喺觀塘行完街，就去咗新匯聚餐廳小廚食，嗰陣時仲係早六點幾去到都仲係冇乜人，我入去睇餐牌慢慢揀，冇幾耐餐廳嘅廚師走咗過嚟自動向我哋推薦佢哋嘅特色菜，聽到佢講到好吸引。師傅推薦嘅招牌話梅骨，酸酸甜甜好開胃好好食，而且完全冇肥肉，炸完出嚟外脆內軟，攞嚟送飯真係好正。另一個招牌菜芝麻雞，喺其他地方真係會食唔到㗎，真係好特別好得意，隻雞一啲都唔肥好瘦，啲肉好嫩滑，連層皮都好好食呀，佢啲雞皮好薄完全冇脂肪，而且仲有鋪滿左芝麻喺上面，咬落真係好脆啊。翡翠炒班球可以話係最冇特色嗰個菜啦，但係都真係好好食呀，旁邊嘅蔬菜好甜好新鮮，魚肉外面因為炸過好香，媽媽最鍾意食呢個。蕃茄紅菜頭南瓜浸豆苗叫咗個佢哋嘅特色菜，因為有番茄同南瓜所以好甜，紅菜頭又好淋，個湯汁好好飲。最後仲有椰汁桂花糕做甜品，好食呢餐食咗好多好多特色招牌菜，每一味都好好食，而且份量都好大，我哋四個人食到好飽個個都捧住個肚走，而且呢度嘅上菜速度好快啊，嗰頭嗌完嗰頭就即刻上菜啦，當我地走嗰陣時成間餐廳已經坐滿晒人啦，證明呢度真係好有人氣呀。