18樓雞煲火鍋專門店

營業中

休息中

黎到旺角嘅18樓雞煲， 呢間18樓喺荃灣大鴻輝已經好出名， 估唔到搬咗嚟旺角， 人氣都不減， 長期都排滿， 真係一位難求。 因為呢度啲雞煲真係幾好味， 同一班朋友過嚟打邊爐就啱曬啦。雞煲夠曬惹味， 雞嘅份量都幾足， 醬料又多配菜， 見到一條條嘅辣椒， 真係令人好開胃， 仲有本人最鍾意嘅紅蔥。 雞食落好嫩口， 醃得夠曬好味。之後就叫咗個是日海鮮同埋海蝦， 是日海鮮係細嘅聖子， 食落冇乜沙， 而且都幾新鮮。 海蝦夠曬大隻， 肉質夠彈牙結實， 唔會有霉嘅口感。白鱔片， 上枱睇落好有光澤， 食落雖然有細細地嘅骨， 但係夠曬肥美， 仲好有魚味。牛肉方面厚度十足， 食落好有口感。 梅頭豬肉， 唔會太肥， 食落都唔錯。甜品方面， 有乳酪味雪糕， 乳酪味真係最正嘅口味， 食完好有滿足感。