老川皇

營業中

休息中

第一次喺香港食到咁好食嘅鮮花椒田雞！喺大陸食過好多都一般，呢度雖然餐牌上面張相影得唔係咁靚，但係店員都覺得呢個餸值得推介，佢話會有啲酸辣嘅感覺，所以我同朋友就即管試吓，都唔知道田雞好補身所以都蠢蠢欲動。果然沒有令我失望，鮮椒田雞用咗唔同嘅花椒、薑、指天椒、青椒同燈籠椒等等。個湯已經好香，充滿不同辣椒的獨有味道。而且田雞嘅數量真係好多，一路食一路啜，嗰啲肉好彈牙同埋滑身，食完之後個胃仲好暖！而且個湯裏面有唔同嘅萵筍同埋酸蘿蔔，令人特別開胃，真係要叫多幾碗白飯黎送㗎。之後仲有個紅油豬耳值得推介，佢有好多好多芫荽，啲紅油唔太辣，食落去豬耳又夠脆，而且切得好薄身，唔會覺得好痴牙。仲有個四川涼麵，可以走辣㗎，唔食辣嘅朋友可以試吓，好有四川嘅特色，上面有花生同埋麻油，真係香噴噴噢！