意粉狂熱 (雅蘭中心)

營業中

休息中

約咗男朋友收工去哩間餐廳食晚餐，兩個人嗌咗個套餐另外加咗個薯皮拼盤。焗薯皮拼盤薯皮香脆，芝士同火腿碎搭得掂，有啲蕃茄醬配埋等薯皮唔會咁乾口，算係開胃小食嘅好選擇。法式芝士洋蔥湯好濃郁，對我黎講重味咗少少，芝士麵包焗得脆。香濃南瓜忌廉湯南瓜味濃，應該有加忌廉，飲落順滑，微甜唔膩。凱撒沙律（半份）生菜爽脆，醬汁酸酸甜甜，雞肉調過味，多啲就好，唔夠喉。芝士焗肉醬意粉肉醬濃厚，見人提過話蕃茄汁好酸，食落係比其他餐廳酸嘅，但又唔會話太過火，個人覺得幾好食。芝士拉絲好滿足，意粉軟硬適中，最重要係食到最後都唔會變到好乾身。咖哩芝士雞肉焗飯同意粉一樣，上枱熱辣辣。咖哩香而不辣，雞肉算嫩口嘅，醬汁再多少少會更好。是日甜品 - Tiramisu正常味道，不過不失，不過伴碟配芒果好似唔算好夾。套餐連加一三舊水包餐湯、沙津、主菜、甜品同嘢飲，其實cp值都幾高。環境乾淨，侍應服務都唔錯。