半島漁港/阿翁火鍋館

營業中

休息中

姊妹聚會最鍾意就係打邊爐，烚吓烚吓邊食邊傾，仲要唔限時可以慢慢食先啱我哋心水。由於我哋食力過人，所以通常都會揀任食火鍋，因為我哋一個住九龍東、一個住九龍西、一個住新界西，所以揀咗灣仔做中心點，見呢間唔限時任飲任食，就試一試。一入座未嗌嘢就先送上贈送嘅刺身、海鮮拼盤同鮑魚鴨掌，估唔到個鮑魚鴨掌竟然幾好食，刺身就一般般，最差係個海鮮拼盤，雖然有蟶子、扇貝、蝦、螺同青口，但望落卻好唔吸引。肉類、魚類、手打蝦滑、墨魚滑同手打丸類呢啲需要落單，其他配料則可以自己出去夾，不過款式種類唔夠新派的台式、日式放題火鍋多，都係得啲普通丸類、魚皮餃、芝士腸、蘿蔔粟米等等，蔬菜仲只得生菜同菜芯兩款，選擇少得可憐。送嗰碟牛肉望落幾好，食落都唔差，但之後再嗌嗰啲牛肉就變咗最Cheap嗰啲美國肥牛，一啲都唔好食，嗌咗一次就冇再嗌，反而啲魚還可以，可惜脆肉魭只得魚片冇魚腩，唯有食多幾碟鱔片補數。3個人埋單$1,082，下次寧願食番台式放題邊爐算，同等價錢啲嘢食靚好多，選擇又多。