雲壽司 (已結業)

終於都到星期五，今個禮拜實在太多嘢做，朋友話要帶我去食高級日式料理慰勞下我，跟住就帶咗我去太子嘅雲壽司。舖頭裝修乾淨別緻，大部分係壽司師傅前面嘅吧枱位置，可以望住壽司新鮮端上，再放入口，視覺同味覺雙重享受！特上壽司拼盤 （$268）總共有10款廚師精選時令壽司，店員有介紹話食材係每日由日本空運到港，今日既拼盤就有白身魚、赤身魚、蝦、赤貝同軍艦壽司，用料新鮮又講究。個人超鍾意海膽軍艦，海膽鮮甜，紫菜脆口！三文魚籽鹹香十足，又鮮又甘！北海丼（$208）吞拿魚腩、油甘魚、赤貝、牡丹蝦、海膽、三文魚同三文魚籽，每款刺身都非常新鮮，尤其是呑拿魚同三文魚腩，油香十足！雲壽司嘅Omakase價格都算親民，有三個價格選擇，豐儉由人。餐廳都幾旺，連日本人都黎食，聽住隔離枱講日文真係倍添風味！