華記潮州滷水車仔麵 (民興大廈)

營業中

休息中

近來報咗個電腦課程，逢星期六早上要去太子上堂，到中午時間放學就喺附近食午餐，今日同學話想食麵，知道界限街有間華記潮州滷水車仔麵啱晒，未到一點已有人排隊，我地一邊傾一邊排，話咁快入得，店員姐姐好好禮貌，話比客人知椅下有個紙箱可放物品。三送車仔麵牛腩、牛丸、咖哩魚蛋，加腩汁、走芫荽，預設係有芫荽的，同學唔食就走芫荽。湯底係滷水湯底味濃，好香滷水味但唔會咸，牛腩好入味，牛丸好彈牙，魚蛋係好大粒，好香咖哩味，裏面雪白有魚味，同樣彈牙爽口。豬雜麵，其他地方係少見我就揀佢，豬雜有多個內臟部位，每一樣都好入味，而且豬雜處理得好，味道甘香，湯底我揀咗加入全部汁少辣，再加秘製潮州辣椒油，真正又香又辣好好味道。太陽餅，兩邊脆皮夾住中間蝦肉油炸，外皮脆卜卜，裏面蝦肉鮮味彈牙，點泰式甜辣醬更好味。新鮮魷魚鬚，好滑好鮮，好有彈性亦好易咬開，用秘製醬汁拌勻加入芫荽蔥花及炸花生粒，味道很好的。