啤啤Bear韓國包車 (已結業)

睇咗Foodie嘅介紹，好奇試吓。完全冇韓國味，但又幾好味。枱枱都會叫果個$68 芝士章魚仔雞肉烏冬真係抵食，用爐上熱辣辣，芝士超多，我記得介紹好似話係跟五花腩，冇咗係有啲可惜。章魚仔個外型都幾得意，但係冇章魚粒咁有咬口，亦都有啲雪味。不過呢個價錢，呢個地段，（仲有好靚嘅裝修，舒服嘅座位）真係唔可以要求太多。跟足個介紹，我叫埋個蒜蓉牛油炸雞。一上菜我就知食唔晒，大概有六至七件，冇骨嘅啖啖肉，仲要好大件，最後兩個人都係每人食咗一件要打包。味道方面，我覺得係超級似越式蒜蓉牛油炸雞，完全唔似韓式炸雞。我仲叫咗介紹比較少嘅炸醬麵，因為自己本身好鍾意食，呢間餐廳提供嘅炸醬麵係鐵板上，又有芝士，又有煎蛋，仲加黑松露醬，所以好奇一試。呢一碟真係有驚喜，炸醬麵本身應該係一個好重味嘅菜式，但黑松露醬完全掩蓋咗炸醬麵嘅味道，可想而知黑松露醬嘅份量非常多。隻蛋都煎得半生熟，可以撈落個面度食，再加上芝士，淡淡都有拉絲嘅效果。我覺得好好味，不過就完全唔係平日食開嘅韓式炸醬麵。