荷里活冰室 (上海街)

營業中

休息中

今日去朗豪坊行完街搵地方食個快飯，喺上海街一出見到對面有間好閃嘅冰室，就決定過去試吓。而家嘅冰室同以前好唔同，講裝修，地方亦都比較乾淨明亮，經過一條長樓梯上到去，見到地方相當闊落，好多梳化卡座，仲有窗邊位可以望住條街食嘢，感覺好舒適。呢度嘅選擇都幾豐富，除左有平時嘅常餐，粉麵飯之外，仲有好多唔同小菜套餐，包羅萬有，連鮑汁花膠扣鮑魚都有，不過今日想食魚多啲，就叫咗個西蘭花🥦爆炒帶子龍躉球，同埋京燒牛仔骨試下，加10幾蚊仲有個飯加例湯。唔駛等好耐，京燒牛仔骨就上枱，分量十足，牛仔骨炒得剛好，一啲都唔靱，仲非常之惹味，連埋京蔥一齊炒真係好香口嘅配搭。 轉眼間西蘭花爆炒帶子龍躉球都到嘞，非常之大碟，而且估唔到冰室都會有啲擺盤，將西蘭花圍邊，又幾靚喎。龍躉肉好大塊而且爽口彈牙，仲有d菇同黃椒，顏色配得好，好味過酒樓，放入口就知道夠晒鑊氣！呢種味道平時自己喺屋企真係整唔到❣️除咗小菜，呢度仲有好多其他選擇，好似晚市有啲特價餐粉面套餐，都係幾十蚊一個，仲要有超過10款選擇，算係幾抵食，下次有機會要黎試吓。順帶一提，呢度嘅侍應哥哥同收銀姐姐都好有禮貌。