餐廳勁多位，食物又勁多選擇，幾款套餐成人低至$258，最緊要係食夠120分鐘，同90分鐘限時真係冇得比，食甜品都可以慢慢試多幾款～ 而家食放題，清酒熱茶咖啡果汁汽水已經係基本，所以我同朋友更着重嘅就係食物質素。 湯底有多款選擇，我地就叫咗椰子雞湯同滋補豬骨湯～先點幾款牛肉就知道呢度大概咩質素。美國安格斯牛板鍵，美國極黑和牛SRF，仲有美國肩胛肉同埋封門牛柳，款款新鮮，個人最鍾意極黑和牛SRF，雪花均勻，淥起上嚟入口軟嫩又重牛味，Encore咗幾次！ 另外必點大蝦，鮮甜而且蝦肉彈實，呢啲質素街市買都唔平，而家仲可以任食，性價比好高！ 一讚呢度嘅蔬菜都係出邊少有嘅，包括冰菜、豆苗、仲有女士至愛抗氧化羽衣甘藍，平時放題點會有呢啲貴菜俾你任食，當然又要添返兩轉！ 就算連醬汁都係好多款，仲有我大愛新鮮青柑桔，解油膩又清新!最後試返幾款雪糕，回本感覺Up!

前排好友又帶我去食Omakase，餐廳雖然位處尖沙咀繁華街道，但低調嘅門面一不小心就會miss左~ 入到餐廳見到師傅已忙於準備食材，而經理亦非常有禮招待，感覺唔錯~ 話咁快就上第一道菜，望落精緻~菜之花外表同食開嘅菜芯好似，但菜味更濃，仲有味道帶甘嘅嵐山尖魚配清甜無花果~ 真鯛刺身口感無咁油，肉色通透肉質爽口，配上柚子感覺清新。 太刀魚用上一夜干做法，食出濃縮左嘅魚鮮味~ 另特意將Creamy嘅蠔蒸一蒸，食落反而有少少脆，咬開非常多汁，夠晒鮮甜。 師傅用又長又尖嘅筷子快速又準繩咁夾起裝飾放在白子上，呢款鯛魚白子比起鱈魚白子重味好多，之前未試過~ 用甘荀、鹽漬昆布及五毛青混在魚肉當中，食到鮮甜魚味另帶爽脆口感~ 每次食Omakase對壽司一環都滿滿期待，今次有地金鯛、黑北寄、拖羅、梳子魚、小肌…最後出場係生雲丹雪糕，師父仲特別比左盒我睇，係嚟自北海道根室生雲丹，片片飽滿，外表睇顏色都知好新鮮好高質，入口甘甜，質感細膩，令人印象深刻。 另外仲有魚湯同自家製法式焦糖布丁配熊本草莓作結尾，成餐飯同師傅不停傾計，又長知識，咁食Omakase就最開心~

愛食韓燒嘅友人極力推介呢間餐廳，話O係韓國有過200家分店，質素有保證~ 店舖地點非常方便，就O係銅鑼灣登龍街，位於一樓，一上到去就感受到股韓風~ 同朋友兩個點左韓豚五花肉、牛肋骨肉同牛肉眼~初初嚟到見碟頭唔算大，諗住實食唔晒，仲追加個蟹籽紫菜飯團，點知食到尾段都差點食唔晒! 塊牛肉眼一睇色澤就知又新鮮又靚!已細心切開一片脂肪以便起爐!輕輕燒好快已熟，入口非常軟淋Juicy! 另牛肋骨肉係超超超好食! 每件肉呈三角形而中間亦較為厚身，燒起上嚟要更有耐性同技考，但呢款肉真係值得一試，入口牛肉味香濃，咬落有筋膜爽口感覺但係好易咬開，同時爆出少許油脂，大推! 最後係韓豚五花肉，脂肪同肉相間，燒起上嚟有豐富油脂夠晒香，呢款包住生菜食就最夾~ 幾鐘意呢度嘅醬汁選擇，有黃芥末醬、香草鹽、海鹽，辣醬等，仲有泡菜、漬物同新鮮生菜都係無限自行添加，夠晒方便!

呢間小店都幾犀利，位置不在大街，但成餐飯不斷見有客入，部分客人仲要等位，一定有佢吸引之處。 望望餐牌一人晚餐包飲品， 加錢仲可以配唔同小食，就揀椰子雞湯飯配蝦餅加香茅斑斕茶。飯同雞肉份量好多，而且雞肉都係滑嘟嘟嘅。蝦餅香脆有四小件。 食泰國菜點少得香濃味野，呢個咖哩軟殼蟹焗麵包就啱晒！唔好睇佢個竹炭外表，切開麵包非常軟熟，勁索汁，d咖哩汁仲多到要用另一個碟裝埋俾客人！ 香蕉煎餅同預期有點唔同，呢個係類此手抓餅，煎到帶點焦，份外香脆，加埋煉奶同花生碎就非常香口，$48有4大份滿滿香甜香蕉嘅煎餅，確係幾抵!

估唔到殿大喜屋開分店開到去MOKO帝京酒店~~ 放得早食晚市頭輪都唔算太多人，點知越夜越旺，食飽走時見到出面大排長龍，其實餐廳沿用酒店以前自助餐位置，容量已經好大，走時見到排成咁都真係 “嘩”一聲~ 自助區食物區款式多，仲有煙霧效果更吸睛!各款冰凍茶飲汽水果汁咖啡清酒要樣樣齊，仲有羅漢果茶同松草花烏雞湯!!! 坐低即點刺身船，款式幾多仲有大拖羅點係幾開心~ 油甘魚夠肥美，其他如三文魚、帶子、蝦等都夠新鮮!!火灸魚背有油香，另海膽菜式都用上北海道海膽，唔錯唔錯! 熟食一樣夠多選擇，一如其分店芝麻雞翼有水準!鐘意乳鴿夠熱辣辣，皮香肉滑，Encore之選~另外龍蝦伊麵細細碟已經有兩件龍蝦肉，醉鮑魚淡淡酒味幾清香~臨尾再點一鍋蟹粥暖笠笠! 尾聲當然不能錯過生果同甜品，雪糕有Movenpick，Haagen-Dazs同Milk Top選擇，生果仲有士多啤梨同榴槤蓉，Yummy~~

金鐘太古廣場呢間餐廳真係唔算貴,地方夠大夠開揚~ 坐低侍應就提供一籃脆卜卜蝦片，帶點辣，幾惹味。 朋友仔喉嚨唔舒服，點煲走辣嘅椰子雞湯，熱住飲好暖胃，雞肉都有唔少。不過應該係走辣關係影響味道平衡變得偏酸，下次點返正常。份量夠，每人都分到兩碗多~~ 朋友建議點份泰式蟹肉奄列，上枱時真係呆一下…原來係咁大份，我地仲怕唔飽點咗個炒粉…奄列內外都有好多蟹肉，食得出鮮甜味道，金黃色奄列煎起漲卜卜，仲有少少薄脆，點埋辣汁幾惹味~ 呢個時候泰式豬肉河粉出現，一睇就知係地道河粉，河粉透薄而入口非常煙靭，肉片入晒味，擠上青檸汁再撈埋沙塘同少少辣粉，成個泰地道感覺出晒嚟!

好姊妹話之前嚟食飯唔錯，拉埋我嚟一齊食晚飯，順便當團年~~ 餐廳一邊落地玻璃，感覺開揚，餐桌之間用上較密嘅垂簾分隔，令客人感覺更私隱外亦令餐廳更有空間感~ 侍應有禮亦樂於協助，餐桌setting清雅，花型杯碟同碗，仲有翠綠色蟹型筷子座~ 涼伴花甲做頭盤~花甲已分為半殼，橙紅色花甲王，隻隻都肥嘟嘟，夠晒鮮甜肉厚，伴有青檸同辣椒醬汁，清香得嚟又惹味~ 油鹽焗香港火焰奄仔蟹夠特別，睇得又食得!侍應席前點火，隨即傳來香味!睇住火焰包圍著奄仔蟹，尤其吸睛~經火燒後，食落蟹肉帶焦香，仲有鮮甜又帶點黏口嘅蟹膏，軟綿滑溜～而且外殼沾滿鹽粒，令人食得特別滋味~ 最後仲有野生油浸荀殼魚~非常大條，外皮香脆不油膩!雪白魚肉好容易就可以一片片起出~配埋特製醬汁，更能特顯魚香鮮味! 甜點桂花糕晶瑩Q彈，再嘆口茶非常舒心~

呢間餐廳頗大，一邊鐵板燒席仲有一邊壽司bar席， 仲有唔少落地窗邊位，望住無遮擋嘅景色，除咗平時食omakase嘅高雅感，多一份chill感！ 今晚朋友拍板食鐵板燒～ 頭盤共有三款 靜岡高糖度番茄- 比一般蕃茄更鮮甜多汁 鮟鱇魚肝- 口感細滑入口即化。 白子配醋物-味道香甜，配上醋物令人好開胃。 跟著係師父自己漬既三文魚子配燒帶子再配上海苔醬汁，鮮味十足！ 燒大虎煆 大大隻，肉質彈牙，蝦頭焦香酥脆，特別香甜。 燒銀鱈魚 銀鱈魚好新鮮，魚皮薄薄一片香脆似薯片咁，魚肉肉質細膩，保留魚油香味。 南非鮑魚 師父好細心已經將鮑魚切好一片片，煮得好入味，淋身充滿鮮味帶牛油香。 厚切美國頂級牛柳 肉質稚嫩，肉味濃郁，帶油脂香氣，加炸蒜更香口亦平衡膩感。 櫻花蝦炒飯 鐵板炒飯特別好食，加上櫻花蝦炒得好乾身，令口感更香脆！ 炒野菜 有冬菇片，肥嘟嘟芽菜等，混埋蒜香醬好惹味！ 最後飲埋魚湯同食埋雪糕，完滿嘅一餐～

呢間拉麵近期好似幾受歡迎，放工就同朋友嚟試吓。 極濃雞白湯拉麵，湯底非常濃厚，用原隻雞烹煮8小時，所有膠原同營養精華盡在湯底之中！雞肉片肉香嫩滑，仲有炸牛蒡，脆口得嚟感覺健康，幾特別～ 蟹肉拉麵有一球蟹肉，份量唔細，一絲絲鮮甜蟹肉，令人食得滿足！蟹湯湯底一樣濃厚稠杰，仲帶點鮮甜，連埋爽彈拉麵入口，好有日本地道風味！ 日式餃子做到外皮勁脆，keep到肉汁！ 串燒拼盤水準令人意外，火候同食物質素都好出色，最愛豬頸肉爽爽嘅口感，黑豚肉腸帶有咸香，但不掩豚肉香味同口感！雞腿肉嫩滑有肉汁，其他仲有雞翼、雞軟骨，豬腩肉同雞腎，夠晒多款式！餸酒一流！ 整體食物質素差唔錯，想來都要趁早，晚市時段好快冇位～

食磯燒除咗新鮮之外，最重要就係火候同時間嘅控制，呢間餐廳係呢幾方面都做得好好，令人食完一樣又期待下一樣！ 首先前菜係由沙甸魚同多春魚整成嘅鯷魚醬，用蔬菜條點嚟食，清口腔得來又做到開胃嘅效果！ 磯煮鮑魚夠入味，鮮嫩彈牙！ 再嚟海膽炸豆腐，賣相吸睛，每件都用上唔同設計嘅小器皿裝著～炸豆腐外層薄脆，內層軟嫩富豆香，海膽鮮味！ 選好磯燒海鮮，準備登場～ 活蟶子咬開有點爽脆咁，只係略為燒過無需特別調味，食得出就係本身嘅鮮甜味道～ 活日本文蛤蜆同活北寄貝各有千秋，朋友鐘意文蛤蜆入口嘅鮮嫩，我就鐘意北寄貝嘅厚肉咬口，當然兩款同樣鮮味,而我覺得北寄貝甜味更濃厚一點，大推！ 重點出場，呢條汁燒喜之次真係不得了！見魚身漲卜卜，魚眼圓碌碌，就知有幾新鮮！魚肉結實而且食物非常鮮甜，魚鰭位燒得10分香脆，食到舔舔脷！ 呢度嘅水產真係無得輸，鮮甜味美，下次想食磯燒一定諗起佢！