滾爺火鍋 (上海街)

營業中

休息中

旺角有好多好嘢食，成日都唔知點揀，咁啱上網搵到呢間爺火鍋好多人推薦，咁就同朋友嚟試吓啦。本身想叫花雕醉雞鍋，但係見到佢嘅椰子雞鍋好靚，而且仲係新鮮嘅椰汁倒出嚟，咁就決定試吓啦。一拎過嚟真係好誇張，有兩個大椰青同兩個椰皇，而且仲有半隻睇落好新鮮嘅雞。職員好好，見到我哋影緊相就叫我哋影好先叫佢，之後佢幫我哋倒啲椰汁同埋雞落個鍋度。估唔到佢係用新鮮嘅椰子嚟做湯底，一倒落去已經聞到好香。等咗10分鐘度就食得啦，佢有一個漏斗計時，所以時間會計得啱啱好。所以一開蓋，椰子味好香，雞肉都好嫩滑，而且雞皮好彈牙，一食就知道係新鮮雞。另外我哋仲叫咗個豬腰，豬腰份量都幾多，而且食落冇腥味，口感好好，好適合拎嚟打邊爐。另外佢嘅魚肚份量都好多，而且食落唔會好似豬皮咁，拎嚟打邊爐吸晒啲湯底就最正啦。呢間火鍋又抵食又靚，而且職員嘅服務態度好好，有問必答，而且仲同我哋介紹雞嘅品種同埋來歷，非常推薦大家嚟試吓啊。