夏麵館 (始創中心)

營業中

休息中

夏麵館有間鮮蟹粉專門店，位於太子始創中心，最鍾意食蟹粉嘅我當然唔會錯過啦，夏麵館主要以上海菜為主，款式好多。餐廳座位闊落，當中仲有卡位，坐得特別舒適，晚飯時間光顧，有一定嘅客流，但唔需要等位，可以即刻入座。鮮蟹粉河蝦仁撈麵依家有試食價，當然要試下啦。只需要$68，依個價錢相當抵試。鮮味十足嘅蟹粉配以爽滑彈牙嘅河蝦仁，手工麵煙韌掛汁。每日限量供應20碗咋，真係手快有手慢無。蟹粉炒粉皮白皙透明嘅粉皮口感滑溜煙韌彈牙，估唔到滑捋捋嘅粉皮都好掛汁，每一啖都有齊蟹粉、蟹黃同蟹肉，充滿鮮甜味。蟹粉小籠包（2隻）皮薄不破嘅小籠包皮，包住湯汁充盈嘅豬肉餡同蟹粉，一口咬落去，即刻爆汁，濃濃嘅湯汁即刻流出，仲見到小籠包湯中流出蟹油，蟹粉味道十分鮮甜。乾煸四季豆乾煸四季豆鑊氣十足，爽口翠綠香脆嘅四季豆配上豬肉碎，爆炒至乾香可口，十分惹味，令人食唔停口。開心果鍋餅平時豆沙鍋餅係上海特色傳統甜品小食之一。今次將豆沙餡料換成開心果，即叫即製十分新鮮熱辣，金黃酥脆嘅外皮毫不油膩，加左少少椰絲增加香味，夾住勁濃郁嘅開心果餡，好滋味。