名門私房菜

營業中

休息中

今日同屋企人去咗食私房菜。呢度有個商務四人套餐，咁啱四個人就完全唔使煩。每道菜都做得精緻，用料新鮮不馬虎，值得一試！ 一開始有個湯暖下胃先。杏汁燉豬肺湯，豬肺處理得乾淨，無異味，杏汁味道濃郁，飲落順喉滋潤。 冰鎮鮑魚夠晒新鮮，肉質爽嫩唔會韌，點少少芥末燒汁，鮮味更加突出，凍食好適合夏天。 鑽鑲黃金蝦超正！鹹蛋黃嘅鹹香完全包裹住大蝦，麥皮脆卜卜，蝦肉爽彈大隻，睇落去成隻炸雞槌咁！ 生煎蓮藕餅外脆內軟，蓮藕片夾住肉餡，肉畀蓮藕粒多，食落似肉餅。 薑蔥焗桶蠔，蠔肉肥美，薑蔥爆炒得夠香，蠔味鮮甜！ 瓦罉豉油雞係全晚亮點！雞皮滑溜，肉質嫩滑，豉油香又帶點玫瑰露味，好有傳統風味。 上湯時蔬，菜心清甜爽口。 招牌名門炒飯炒得夠乾身，裏面有啲蝦仁叉燒同埋蔥粒，簡單但美味！ 最後仲有海帶綠豆沙送，鍾意佢唔會太甜，清潤解膩，為呢餐完美作結。