燒肉屋 (清風街)

終於等到9月開學，仔女返哂學梗係要同老公撐枱腳啦！搬咗去東區之後發現原來港島真係美食天堂，而今次就同老公嚟到天后清風街嘅 #燒肉屋 食午餐。店內係日式居酒屋嘅裝潢，我入店仲有陣陣燒肉嘅香氣。坐低快睇餐牌就諗到食乜！一於叫個 #午市商務二人套餐 啦！落咗 order 之後會先嚟件菜 + 湯，有酸酸辣辣嘅 #韓式泡菜、爽脆嘅 #蓮藕片，仲有海帶，同埋我好鍾意嘅 #麵豉湯。跟住再嚟就係超開胃嘅 #八爪魚柚子醬醋沙律，超開胃又好味！跟住就嚟主菜啦！身為三文魚愛好者就叫咗個 #流心熔岩蛋三文魚飯，飯面仲有大量紫菜碎，成個飯係估唔到咁好味。嚟得呢到個個都係想食燒肉，我哋就叫咗個 #爽脆豚肉片，燒到底面都脆卜卜，加啲泡菜配埋個紫菜飯，真係好食到停唔到口。仲有好靚又一定要影咗相先嘅 #超長日式牛仔骨，咁長點燒呢？唔洗怕，枱上有鉸剪提供，客人可以將牛仔骨剪開做細細件，再慢慢燒，牛仔骨肉味超香，用嚟配飯一流。至於飲品我哋就飲汽水，店員仲會配埋冰底 (平時冰底要加錢)，呢到唔洗，隻杯仲要好靚添呀！總結：店內環境舒適，望咗好耐諗點解頭頂咁多沙包，原來係紙巾嚟㗎！搵機會一定要帶埋仔女嚟食先！