黑木亭居酒屋 (金馬倫道)

五月真係多人生日，我個好朋友都係五月壽星。每個星期一我哋都會去佐敦上堂，通常會一齊食晚飯。今次趁佢生日，我特登約早少少，帶佢去食日本嘢慶祝。 我個朋友好鍾意日本，平時每年都會去旅行，但今年太忙去唔到。見佢咁掛住日本，就諗住搵間有日本風味嘅餐廳同佢食飯。上網睇咗好耐，最後揀咗黑木亭。 間餐廳嘅裝修幾有心思，一入門口就見到日式風格嘅樓梯，上到去仲有啲日本海報同擺設，感覺幾舒服。我哋叫咗個宮崎和牛加豚肉壽喜燒，原價要五百幾，但咁啱有優惠，三百幾就有得食。上枱嗰陣見到個湯底做咗隻小熊仔嘅造型，幾得意，朋友都話好驚喜。 另外叫咗個前菜，係用Oreo脆片包住嘅薯仔沙律，外形似雪茄，食落幾特別。仲叫咗廚師發辦壽司，魚生幾新鮮，師傅嘅手勢都唔錯。 食到一半嘅時候，餐廳有Live Band表演，唔係講笑，唱得好好聽氣氛昇華左好多，我哋一邊食一邊聽歌，好有氣氛。見到朋友食得開心，我都覺得今次揀呢間餐廳係正確決定。 👍🏻