宙串燒日式食堂

營業中

休息中

喺街坊群都有聽聞涌美有間日式食店風評唔錯，今日終於去試吓了。6pm 去到見落左閘，以為摸門釘。唔甘心行埋去睇，原來入面有燈同有個似老闆嘅人坐左喺度，再等多一等就真係開門了。兩個人叫左咖哩吉列豬扒飯、串燒牛脷、三文魚鰭同白鱔。吉列豬扒當然無日本專門店嗰啲咁 juicy，但唔硬唔柴，我覺得唔錯，而最欣賞係咖哩飯入面有蔬菜，十分平衡，飯量也多，仲送凍綠茶一杯。呢間店串燒多數係醬燒（不過我後來聽到隔離枱落 order 時有強調要鹽燒，唔知係咪可以選擇呢），個醬我覺得偏咸，可能為左送酒，所以個白鱔咸左少少，同份量較少，不過肉質非常好，有彈性，如果可以大件少少就好啦。牛脷同三文魚鰭都疑似老闆送多件比我地食（唔通因為我等開門？）牛脷好食！燒得啱啱好，好淋有肉汁，無奇怪味。三文魚鰭就正常，用同一隻醬黎燒但無白鱔咁咸，可能因為肥份多啲。食完晒其實夠飽，不過仲有啲為食，所以叫埋個 Set A 試吓。樣樣都好食，尤其係個雞腎，好 juicy。