拾味山西刀削麵館

營業中

休息中

刀削面可算為巧手料理，超市買到嘅都係機製嘅，又薄又無口感，有d餐廳就真係人手削嘅，但師傅手勢唔好，厚薄不一，又或者削到好厚，好似食麵粉團咁都係no good！呢間刀削面館就唔同啦～夠正宗！師傅功夫一流，每條麵條嘅粗幼大細都平均，食落非常煙韌彈牙！加上係即叫即削，唔會話一早煮好再返熱。我點咗一個撈麵一個湯麵，各有特色！口水冷刀就係口水汁撈麵，辣辣地幾開胃，加埋d青瓜絲同花生等等，增加口感之餘又帶點清新。$59配一個餸，我就叫咗手撕雞，另外再加$10配燻蹄絲。一絲絲嘅野配撈麵就最夾，又易掛汁，而且食落啖啖都有料，重點係佢嘅料都比得足嘅。湯麵$48我就配咗麻辣豬脷，其他麵店好少有得食，所以就試下。佢個汁都真係幾辣，而且係帶後勁嗰隻，一開始唔覺，愈食個人愈熱食到出晒汗，好彩配湯麵，可以沖淡少少（不過最後都係頂唔順叫杯可樂）。我再加$10叫個豬軟骨，佢同豬脷放埋一齊，所以都變咗辣......但一讚嘅佢個豬軟骨真係好好好軟好林，好好味！我見好多枱客都有食呢個春卷，所以我都叫個試下，又真係幾唔錯！炸野即叫即整就已經加分啦，越式春卷同其他春卷唔同，個皮薄d又好鬆脆，入面嘅料都入味嘅，都值得一試。