米走雞Deluxe (已搬遷) 新店位置

之前食過米走雞觀塘分店，今次食銅鑼灣呢間，係樓上舖嚟嘅，不過位置唔難搵。餐廳面積唔算好大，但係座位寬敞，隔離冇人可以用埋張枱。湯底方面，我哋揀咗豬骨胡椒濃湯，非常入味，齋飲湯都好好味。個肥牛薄薄地，我哋叫咗大份，二百幾蚊，都係比細份貴少少啫。牛肉體積都幾平均，放落去幾秒就熟，好容易控制。響鈴值得推介，雖然有少少邪惡，但吸曬啲火鍋湯好正，記得唔好放咁耐。五寶丸一共有十件，每款兩件，有豬丸、蝦丸、牛丸、墨魚丸、魚丸，大大粒新鮮都幾滋味。我哋仲叫咗啲蔬菜，食火鍋叫返啲生菜感覺健康啲。另外值得推介係炸魚皮，外皮好脆。最後我哋仲點咗薯粉，飽肚之選可以喺最後先食。飲品方面，推介竹蔗茅根，一壺六十幾蚊，唔算好甜，用嚟解渴係唔錯嘅選擇。