去滾

營業中

休息中

呢排喺銅鑼灣搵食，發現咗一間超有格調嘅打邊爐餐廳，叫做去滾。呢個名真係幾盞鬼，加上入面嘅設計仲好有型，充滿霓虹燈，好適合打卡，簡直係視覺同味覺嘅雙重享受！講返食物，佢啲材料真係冇得彈，全都係高質又精緻。我哋揀咗招牌清酒煮卜卜蜆湯，職員仲會幫你即席炒蜆，用麻油同牛油炒香，香氣即刻飄滿成間餐廳，之後再加清酒，真係震撼又有氣氛。啲蜆全部大粒鮮甜，每粒都飽滿得嚟仲啖啖肉。至於肉類，我哋點咗頂級靚肥牛，油花分佈勻稱，唔會切到太薄，食落好有咬口，仲入口即化，超滿足！炸支竹炸得啱啱好，冇過份油膩，仲保持到濃濃豆香。手打黑白墨魚滑同手蛋牛丸都係必試之選，特別係牛丸，咬開嗰陣仲會爆汁，Juicy到不得了，墨魚滑仲食到粒粒墨魚，完全用心製作。最後甜品方面，一定要試雜果味爆爆珠仙果凍，中間乾冰噴煙嘅效果真係一流，打卡又搶眼。西瓜同蜜瓜配埋花奶好清新，再加埋芒果味爆爆珠，咬落去有層次，仙草仲可以解晒啱啱打邊爐嘅油膩感，完美收尾！呢間餐廳真係視覺同味蕾嘅享受，推介！