漢發麵家 (大南街)

營業中

休息中

難得放平日，就潮聖深水埗食個tea，呢間以豬潤見稱嘅小店一直喺深水埗起晒朵，唔好再同我講豬潤麵梗係食「圍」記，叫得「圍」就預咗俾狗圍，豬潤薄過A4紙之餘，口感仲要鞋到好似擺咗張沙紙落條脷一樣，免費都唔會去。講返呢碗豬潤牛肉麵先，睇相都見到塊豬潤有幾厚，真係同隻麻雀差唔多咁厚，重點係表皮脆口，內裡粉嫩，堅係我食過咁多間以嚟最好食嘅一間。牛肉就普通滑牛啦，唔通我又讚到上天咩，不過啲牛肉大小不一，有啲仲碎濕濕，麵就普通丁麵，但可惜淥耐咗，麵身偏淋，係我黑仔咁啱呢個淥淋咗啫，又唔關品質問題嘅。總括嚟講，鐘意食豬潤嘅人，呢間一定唔會令你失望，只係價錢偏貴，無餐嗌，散叫一碗要$44，叫埋杯凍飲$19，食餐tea都要$63，耐唔耐經過深水埗又唔駛排隊都可以一戰嘅。