The Platter (悦品度假酒店‧屯門)

營業中

休息中

記得大概半年前食過荃灣悅品酒店嘅半自助餐，感覺唔錯，又平又多嘢食。今次入屯門搵朋友去食屯門嗰間悅品酒店，都好唔錯喎。我見好多客人都係嚟staycation，可能有套票優惠，不過我哋就咁食都唔貴呀，因為個main整得幾好味，好過出面好多西餐，而且包埋凍海鮮、沙律、湯、麵包、甜品任食，都幾多嘢食，尤其適合小朋友，因為有好多火車嘅擺設，仲有兒童套餐，我見在場所有小朋友都食得好開心😍主菜真係有驚喜嘅，尤其係燒芥末黑毛豬，好有驚喜，肉質嫩滑，又唔會好肥，配上甜甜哋嘅蘋果醬汁，非常夾。而海陸大餐都好豐富，有美國菲力牛柳、大虎蝦、仲有杯酒同haagen Dazs雪糕，好滿足，牛柳五成熟啱啱好，好嫩，不過食完已經七成之後攞咗啲凍海鮮食，雖然唔係好多種類，不過幾樣野都彈牙嘅，而且好快refill。沙律🥗都好新鮮，可以整Caesar salad。另外南瓜忌廉湯都唔錯。甜品方面一定要整班戟食，望住部機慢慢將舊班戟整出嚟，都好解壓，而且細細舊食完冇負擔。餐廳最好係冇限時，6點開始，食物供應到8點9，完全夠時間食，可以同朋友坐吓傾吓偈，都幾休閒。