秋田鐵板燒刺身專門店 (已搬遷) 新店位置

Item: 秋田鐵板燒刺身專門店
Rating: 4
Author: 奧志雷

Akita Teppanyaki, Sashimi

54 食評

味道

環境

服務

衛生

抵食

2486

尖沙咀

$401-800

日本菜鐵板燒壽司/刺身

奧志雷

等級4

2.1K

我的第二次，又黎 Omakase！考慮左好多間日本料理，最後決定秋田，質量有保證。步入諾士佛臺秋田，師傅們又轉晒，都有段時間無黎食野喇，menu 就完全無變，裝修感覺舊左好多，即係殘左囉，無以前咁光鮮。朋友仔未到，叫支出羽櫻飲住等啦，清純香甜出羽櫻伴刺生或壽司都非常正！見師傅們非常忙碌地不停製作食物，今晚非常旺喎。好奇地問問今晚咁忙，我 order Omakase 有無問題架？師傅們答當然歡迎啦！頭盤漬物，鮮淮山漬，醬油清香又脆口，非常喜愛。酸蒜頭、酸蘿蔔、芹菜漬夠醒胃，海鹽帶子裙邊爽到索索聲，全部滿意無得彈。蟹膏豆腐，滑豆腐極度幼滑，放入口中用舌頭慢慢品嚐，滲出香濃蟹膏味道，加上脆卜卜既蟹籽，非常醒神。螢光魷魚漬，去到每間日本餐廳都必食！鮮味多汁爽脆帶醬油咸香，非常美味。真明堅刺生薄切，食完我指定既頭盤螢光魷魚同蟹膏豆腐後，Omakase 正式起動！第一道菜係真明堅刺生薄切配酸醋，質地結實彈牙有嚼勁，清淡魚味，配果醋好食過芥豉油好多喎，高質好味道！活角螺刺生，第二道菜都係我指定既，見師傅們不停地開得咁高興，我梗係要嗅熱鬧啦。活角螺刺生脆到卜卜聲呀，比象拔蚌更脆口！味道香甜鮮味帶淺淺海水味，好鬼正！好食到想獨佔全隻角螺呢！但我又點捨得咁做喎，哈哈。伊佐木刺生，第三道伊佐木刺生，有趣有趣！脆皮好得意，趙到索索聲，從來未食過咁既刺生。魚肉軟棉，魚味比真明堅稍濃一點，good！由淡食到濃，基本 concept 啦。炸銀鱈魚皮配鰹魚肝漬，中場小休片刻。炸銀鱈魚皮配漬鰹魚內臟醬，個醬甘香帶咸好惹味呢，有點魚乾油香！食一舊再呷杯出羽櫻，爽爆。火炙金目雕刺生，朋友仔原來最愛雕魚，mark 低先。再黎火炙金目雕刺生，比起前兩種魚既魚油豐富好多，非常油潤、非常甘香啊！滑嘟嘟，好幸福啊！赤鱸刺生，極致肥美，比上一度刺生魚味更濃、更油潤。肉質嫩滑非常，魚油甘甜香口，中間特意釀入日本萬能蔥令到味道帶清爽，層次更豐富，有創意！我鍾意！牡丹蝦刺生，師傅仔最初推介時，我覺得太普通想惋拒架喇，點知佢再游說非常新鮮而且造法特別。好！我信您，即管一試！好食到拍手掌，力推！只係簡單地將蝦頭既蝦膏取出，再搽滿蝦肉加上萬能蔥，特濃甘甜蝦膏味緊緊籠罩住蝦肉，好正呀！鮮甜蝦肉帶黏黏爽彈口感，超讚！甘香 After taste 久久不散，突出既料理，我比您滿分！師傅仔您有前途！自家製安康魚肝配酸醋，加上萬能蔥及鮮蕃茄蓉，其實味道清新、做法特別，唔錯既。酸咪咪可減去肝臟滯滯感覺，但依家打成粒狀，已經無左天然糊口、漿住既感覺，而且肝味淡左。我較喜歡原味整舊，淋上淡醬油及洒上萬能蔥同吃，已經好好味。頂級馬屎海膽軍艦，係我指定既頂級馬屎海膽軍艦，海膽係我其中一種喜歡既食材。海膽多過飯，勁足料，哈哈！非常鮮甜既海膽，絕無半點腥味，而且咬落好有彈性，配上高質壽司飯，乾爽嚥韌飽滿帶微微甜醋味，太好食喇！朋友仔對海膽麻麻，又係獨食難肥既好機會喇！火炙雕魚刺生，朋友仔最鍾意雕魚，專登叫師傅仔出多一款，最後一味刺生。火炙雕魚刺生，魚油澎湃滴出黎呀！夾起既時候有點跣手既感覺，要大力夾實。口感棉棉滑滑，入口即溶既魚脂，直衝食道，可毗美極上吞拿魚腩。勁香甜，無得頂！屬全晚頭三位既極品！麵豉鮮魚濃湯走蔥，好香好滑好味！加點紹菜更加香甜。原本我想要蜆肉麵豉湯，但師傅仔推介魚湯，朋友仔又喜愛魚湯，就要您啦。麵豉鮮魚濃湯多蔥，朋友仔愛蔥，叫師傅仔將剩餘萬能蔥全部比晒佢啦，堅多！多謝晒。牛油煎銀鱈魚，超濃牛油味，煎得香口、肉質滑溜又 juicy！銀鱈魚都係朋友仔既飛佛。乾煎大蝦，特濃蝦味，又鮮味帶甜無得輸啦，蝦頭脆卜卜，滿意！但似乎蝦肉煎耐左少少喎，有點乾硬。一大一細出羽櫻剛剛夠我地兩個飲乍！大家飲飽食醉又 high high 地，食得開心。師傅仔都好用心機招乎我地，價錢同質數都跟千里禪不相伯仲，只係所選款式有點單調，八成都只係魚類刺生呢！上次千里就非常全面，刺生、火炙、壽司、手卷、熱燻、鐵板、天婦羅、湯、自家製甜品、等等。乾煎大蝦、牛油煎銀鱈魚、麵豉鮮魚濃湯、火炙雕魚刺生、頂級馬屎海膽軍艦、自家製安康魚肝、牡丹蝦刺生、赤鱸刺生、火炙金目雕刺生、炸銀鱈魚皮配鰹魚肝漬、伊佐木刺生、活角螺刺生、真明堅刺生薄切、螢光魷魚漬、蟹膏豆腐、鮮淮山漬、酸蒜頭、酸蘿蔔、芹菜漬、出羽櫻！兩口子 Omakase 食左 18 款，驚死人咩，咁鬼大食架！哈哈。