牛牛日式火鍋放題 (北角匯二期) (已結業)

收工同朋友去打邊爐，朋友帶咗我去佢常去嘅一間日式任食火鍋，今次揀咗套餐3，澳洲和牛任食，呢度係一人一鍋，啱晒各人唔同口味，又唔使互相遷就。雖然我揀咗奶油豆乳鍋，但係都有試下朋友嘅意熟成蕃茄鍋。奶油豆乳鍋有好濃嘅豆乳味，冇好多額外嘅配料蓋呢浸好香嘅豆味；而蕃茄鍋入面仲有一整塊芝士，所以除咗蕃茄味之外，仲有一絲絲嘅芝士奶香。套餐3除咗包含晒套餐1&2嘅食物之外，額外仲可以任食澳洲和牛、澳洲安格斯、極上牛舌、海扇貝、自家製韭菜餅等等，其中當然最推介澳洲和牛啦，輕輕淥一淥就食得，牛味好香濃，除咗呢款牛肉之外，我亦都好推介封門柳，牛味更加濃郁之餘，口感更佳。另外自家製韭菜餅亦都驚艷到我！外皮博得來好脆口，入邊嘅餡好豐富，滿滿嘅韭菜同豬肉碎，估唔到咁好食，推介！除咗喺出邊自助包可以夾到其他火鍋配料之外，仲有好多配料可以喺QR code度落單，上菜速度快之餘仲好準確，打完邊爐仲可以喺出邊拎movenpick雪糕，亦都有雪條選擇，仲有大量嘅飲品可以任飲任揀！值得提嘅係揀套餐3或者4仲可以免費任飲清酒、紅酒、白酒，好抵呀！