大滾友火鍋

今日入元朗搵朋友聚個舊，佢介紹我食呢間，九半後有8折，都好多人下，不過十幾分鐘都入到座，可以諗定想嗌咩食先。我話想食蜆，所以嗌左泰式冬陰公卜卜蜆鍋，一上個鍋覺得陣容鼎盛，啲蜆都幾大隻又多，起碼三十幾隻，仲要好鮮，食到啲殻搭到勁高，都幾抵。另外嗌左鮮鮑魚，係幾鮮，咬落去有啲彈性，軟硬適中。桂花蚌爽口彈牙帶點鮮味。鵝腸脆爽滑嫩，燙幾秒鐘，微微打捲既狀態係最好，唔洗鬆開筷子，煮老左就會無咁好食。蟹子鮮蝦滑，爽口彈牙，蟹子痴住左係蝦滑上面令佢食落有口感，好鮮嫩。豬頸肉油脂唔多，肉中帶有軟筋，口感軟嫩，不過相比起其他野食就顯得無咁特別。手打鮮牛丸比起普通牛丸軟身啲，但保留左牛肉本身個種鮮嫩的口感。最後有個甜品送，揀左朱古力奶凍，味道還可以。