影片
更多
2021-06-07
5849 瀏覽
瑞吉酒店(St. Regis Hotel)作為萬豪集團旗下(Marriott)最高評級(第8級)酒店，除左優質既酒店質素外，酒店入面既餐飲服務當然亦都有相當高既水準。等左兩個月，今日小編終於等到預訂日而可以親身品嚐到瑞吉酒店內The Drawing Room喇!瑞吉酒店位於灣仔接近會展既地方，如果由灣仔站出發就可以先沿灣仔往會展既行人天橋，去到入境事務大樓後轉右往中環廣場，再之後轉右出返天橋，響出天橋個陣就會見到瑞吉酒店獨特既外觀喇。然後沿行車天橋底過對面，落返地面後就係瑞吉酒店既入口。瑞吉酒店既特色係員工與客人既比例係非常高，務求令每位客人都適時獲得服務，而當小編去到門口，都即刻有2位員工引領我地進入大堂同搭升降機；當到時2樓酒店大堂個陣，都即刻有員工引領我地去The Drawing Room餐廳。基於酒店大堂既樓底非常之高，令到The Drawing Room既空間感十足，所以當每枱顧客傾計既過程，都唔會因為從天花反彈聲音關係而令環境有嘈吵既感覺。優秀既環境其中1個原因，除左非常高既樓底外，就係附近既景色：雖然灣仔區附近都係高樓大廈，但The Drawing Room既景觀係面向港
瑞吉酒店位於灣仔接近會展既地方，如果由灣仔站出發就可以先沿灣仔往會展既行人天橋，去到入境事務大樓後轉右往中環廣場，再之後轉右出返天橋，響出天橋個陣就會見到瑞吉酒店獨特既外觀喇。
然後沿行車天橋底過對面，落返地面後就係瑞吉酒店既入口。瑞吉酒店既特色係員工與客人既比例係非常高，務求令每位客人都適時獲得服務，而當小編去到門口，都即刻有2位員工引領我地進入大堂同搭升降機；當到時2樓酒店大堂個陣，都即刻有員工引領我地去The Drawing Room餐廳。基於酒店大堂既樓底非常之高，令到The Drawing Room既空間感十足，所以當每枱顧客傾計既過程，都唔會因為從天花反彈聲音關係而令環境有嘈吵既感覺。
優秀既環境其中1個原因，除左非常高既樓底外，就係附近既景色：雖然灣仔區附近都係高樓大廈，但The Drawing Room既景觀係面向港灣道公園，而同時玻璃外都有室外既用餐區，變左用餐既時候都能夠睇到少少綠茵既景色，而同時亦可以照顧到喜歡於室外用餐既客人。而每枱都預先設置一陣享用鬆餅所用既果醬及蜜糖，以及一棵溫和色彩既盆栽，予人舒服既感覺。
小編與老公一坐低後，就即刻有員工熟練地去介紹佢地總共12款，來自唔同地方﹑唔同品種既茶葉，而小編就選擇左來自南非，特色係全無咖啡因，以唔同草藥所制成既草本茶Honeybush Chai；而老公就選擇左來自中國安溪鐵觀音，混合西北非摩洛哥既薄荷茶葉Moroccan Mint。Honeybush Chai飲起黎有少少草藥味，飲落去似寧神茶而唔會有茶既澀味；而Moroccan Mint完全係薄荷味既中式濃茶，有少少似紫蘇葉煲出黎既茶味。而最特別既，係員工當見到你手上既茶杯少左一半茶既份量個陣，佢就會即刻幫你加茶；亦都會間中去留意住茶壺夠唔夠水而補充，主動加茶行動相信響唔太多既下午茶內會遇到，有時加茶既速度都令小編有少少覺得唔好意思吧!
享用左大約10分鐘既茶後，餐車正式到達喇! 同樣情況，負責既員工(Tony)首先再次解釋The Drawing Room下午茶既組合為4款咸點﹑4款甜點﹑2款鬆餅。
然後再熟練既介紹每款咸點既成份及大概特色。花多眼亂下最終與老公都各自選擇自己心儀既咸點，等小編轉頭介紹下自己所揀咸點既評價吧!
1) The King of France (左上): 推薦! 由鵝肝醬慕絲及以醋醃製既無花果製成既撻。當大家本身擔心鵝肝醬會好油膩既時候，無花果既酸味會絕對幫你中和返。鵝肝醬好濃郁，對小編黎講其實有衝動再食多個架!
2) The Laks of Norway (右上): 好味! 由三文魚混合青瓜及蕃茄為主體，再加上少少既牛油果醬響面，連埋米餅一齊食好似有夾餅既感覺；亦因為混合了青瓜，令三文魚蓉既味道變得清新而唔太覺得有腥味。
3) Flavours of Japan (右下): 推薦! 細細件既帶子上滲入左柚子同青檸汁，令你食個陣會有意想唔到既清新 (但又唔會太酸)。當然帶子既鮮味會因為酸味而受少少影響，但加埋下面熱香餅一齊食，呢個特別配搭既感覺大家要試下!
4) Sicilian Veggie: 好味! 呢款開胃食品係來自西西里島傳統燉菜及茄子，再放入撻內，而令蔬菜煮出黎既汁可以保留。食個陣會有茄子既質感，同時表面既芝士片令你覺得唔會太單調!
響享用咸點過程中，都聽到員工會隨時向其他同事報告每枱享用進度而準備鬆餅，變左響咸點完成後大約5分鐘左右就奉上每人2款(原味及提子味)，共4件既鬆餅喇。鬆餅唔算話好鬆軟而出色既，但配合果醬及蜜糖都唔錯。
而當中4款果醬及蜜糖包括紅莓﹑有機橙﹑紅果，以及花蜜。紅莓本身小編都擔心佢會太酸而影響鬆餅，但事實上紅莓醬完全覺得唔酸，而配合Clotted Cream享用會令你覺得似士多啤梨醬既感覺；有機橙會有橙皮既成份，反而會有偏向橙皮苦味既感覺，但如果怕甜既朋友應該都會幾吸引；紅果其實即係黑加侖子果醬，唔算太甜，小編就覺得唔駛配合Clotted Cream而直接與鬆餅享用；至於花蜜會比較甜，小編就覺得與牛油享用會比較合拍。
最後就正式到甜點出場喇。同樣道理都係每人由8款既甜點入去去揀4款，但今次小編與老公都想試下唔同種類甜點既感覺，所以我地決定每款都揀，然後再分享一齊食。員工知道後就即刻每人準備1隻細碟去作品嚐用，而所有既甜點就放埋一齊，方便我地去影相同分享。
響每人只可以揀4款既情況下，不如就由小編直接推薦精選既4款甜點俾大家考慮啦! (詳細甜點餐單可參閱上文既圖片)
1) The Rose Ring: 入面既Panna Cotta有少少荔枝肉，而同時因為有少量椰子Cream所以令人覺得清新；呢款Panna Cotta其實可以直接當奶凍去享用，口感都係差唔多，但就唔會有本身Panna Cotta個種莓味，好值得推薦俾鍾意較清新味道既人。
2) Sparkle Forever: 雖然外觀睇落去都有少少似柑桔，但其實整個甜品都係以橙為藍本：橙味非常突出! 而入面既橙蓉好香，唔似之前香橙果醬個種苦澀味，唔算太甜之下作為第2款甜點食係適當既。
3) Prosecco Tart: 雖然成份上佢有寫係Champagne Ganache，但其實食落去又唔太覺既，反而桃味既Cream味道非常濃郁，響無果肉襯托情況下咁強味道都令小編覺得深刻。
4) Sweet Potato: 表面上係以紫薯為顏色既甜品，但實在當中配搭非常特別，因為響橙味既凝乳當中會有特濃咖啡既慕絲，食既時候反而會有好似飲橙味咖啡既感覺，同本身甜品名會有好強既違和感!
滿足既下午茶過後，小編終於親身感受到點解The Drawing Room響咁難預約情況下，但同時亦繼續得到唔少食家既好評及推薦。
預約方面：The Drawing Room雖然平日既預約都要至少2個月既預約期 (假日預約為至少3-4個月)，但勝左可以經網上或電話預約，而唔需要好似The Butterfly Room咁響每月1號早上搶訂；
服務方面：如食評所及，大量既員工會一邊工作時一邊留意你既需要而適時服務，而同時又唔會令你覺得有壓力。例如小編享用過程中唔小心跌左口罩套，員工都會即時溫馨提醒並提及全新既替換；
食物方面：雖然8件響份量上未必夠男士享用，不過佢勝左可以付費添加，而同時其實咸點及甜點各4件下，其實都令你唔會有太油膩既感覺，正正滿足唔同人既需要!
再睇下2位用$768(未加一)既價錢，雖然相比其他酒店既下午茶係有少少貴，但環境及服務的確已經令佢地獲得唔少分數，所以小編都覺得係算抵食既! 就小編而言，The Drawing Room如果再次預約到既，我都會繼續推薦俾其他朋友一齊去享受!
張貼
