中央飯店

營業中

休息中

重陽節long weekend ，專程嚟到深水埗中央飯店，感受舊式酒樓車水馬龍嘅氛圍，蒸氣、叫喊同新聞報道共冶一爐，場內以中老年人為主，有一兩枱遊客，互不打擾，一種大隱隱於市嘅閒情逸致。蒸籠點心除咗日常選擇，傳統一啲仲有大包同魚肚燒賣。阿姐都會推住煎釀三寶等嘅熱氣之選繞場。特別推薦雞紮、鮮蝦粉果同芋角，完美演繹大件夾抵食，份量十足，味道亦不差。至於蠔仔肉鬆湯飯，價錢親民，用料的確大方，如果已經食咗點心，三至四人share都好足夠。不過口味偏淡，未有特別記憶點，建議留力食點心。最後嗌咗酸甜炸軟殼蟹，非常可惜嘅一道餸，軟殼蟹新鮮炸好，理應香脆可口，但係未加溫嘅酸甜醬好似一盤冷水，幫軟殼蟹迅速降溫，又熱又凍嘅口感相當突兀。總括，中央飯店充滿舊區情調，係一幅樸實無華嘅平民寫照，點心表現豪邁大方，但嗰日試嘅小菜就不盡人意，希望下次試佢嘅晚市會有更大驚喜。