醉潮館

營業中

休息中

懶洋洋既星期日男人話想食打冷小菜, 荃灣三坡坊成條街都係潮州菜, 我地揀咗街尾呢間新開既"醉潮館", 見星期日又好早已經肚餓就早啲去食飯, 時間六點幾已經差唔多滿座喇, 遲黎一步就要門口等位了。餐廳裝修比較特色中國風格, 牆上既紅色如意結好搶眼, 連餐牌都係好似武林秘笈。 見到"草本湯目"比較吸引我, 平時都係無飯煮婦既我湯水少, 餐廳每日都有唔同既指定燉湯。🔸花膠螺頭炖雞🔸我覺得一盅都夠二人份, 好足料, 湯好濃好甜, 夠哂味, 我一連氣飲咗兩碗。🔸蠔餅🔸潮州菜常客, 打冷無佢會失色。 好香脆, 蠔仔都幾大粒多汁, 好鍾意食咁脆既蠔餅。🔸醬滷拼盤🔸比平時其他店食既更豐富, 滷蛋, 五花腩肉, 豬腸, 紅腸, 魷魚, 韮菜花, 豬耳等等, 滷得入味。🔸欖菜四季豆🔸經常點既一道菜, 夠惹味, 送粥送飯都正。值得推介既一間餐廳, 鍾意地方夠乾淨, 食物味道都好, 而且仲有炖湯。 點菜後見隔離枱既海鮮粥同乳鴿都好似幾好味, 下次再黎食。