候基室

營業中

休息中

喺佐敦八福匯地下有間叫「候基室」嘅餐廳。呢度有不同國家風味嘅熱狗，例如香港、台灣、日本、墨西哥、韓國等，梗有一款啱你口味。我比「日本餓媽卡些熱狗」呢個名吸引就嗌左個黎試下。包外脆內軟，口感軟熟。法蘭克福肉腸入面有d芝士，一咬，d芝士就喺口腔內「咇」曬出黎，好芝味呀！😆除左法蘭克福肉腸，重有鰻魚、蟹柳同木魚碎，用料豐富。一啖咬落去同時食到咁多款食材，口感超豐富，大滿足！😋配上秘製醬同鰻魚汁，醬汁食落甜甜酸酸好開胃。經典三色披薩有辣肉腸、蘑菇、青椒等配料，辣肉腸唔會太辣，味道恰到好處，各款配料搭配得宜。披薩即叫即焗，又熱又香又脆，口感煙韌。朋友話天氣熱，想飲杯凍飲。佢嗌左杯「台灣百香果果茶」。入面重有蒟蒻，可以邊飲邊食。唔會太甜，有果香，飲完暑氣全消！我鍾意飲茶，見有杯「金邊免疫花茶」。依家疫情，想增加免疫力就嗌杯試下。店員話我知原來茶包入面嘅材料全部都係柬埔寨一間學校嘅學生種植。咁有意義梗要買杯支持下啦！餐廳內有好多旅遊書，比食客邊食邊睇。幫襯完呢間餐廳令我好想去旅行呀！😭餐廳旁邊有d賣二手衣物同書本嘅檔攤，食完重可以去行下。