龍亭

近排天氣有啲凍，除咗打邊爐同食煲仔飯之外，鐵板燒都係一個唔錯嘅選擇，加上朋友係鐵板燒愛好者，所以帶咗我去試一間係佐敦新開無耐嘅鐵板燒。因為無訂枱所以當晚吧枱位置滿咗，餐廳私隱度非常高，而且仲隔晒外面嘅嘈音，可以舒舒服服咁食飯，我地叫咗入門廚師發辦套餐 (五道菜)，再叫咗有買一送一優惠嘅麒麟啤酒。雖然係沙律但係都唔馬虎，估唔到有魚子醬食。海鮮揀咗元貝同帶子另外再加咗隻特大虎蝦，元貝同帶子非常新鮮啖啖肉。鐵板肉類有豬牛雞選擇，我揀咗五成熟牛，肉質鬆軟牛味濃，可以配搭芥末，蒜片，海鹽三種不同嘅食法。炒飯粒粒分明有咬口，而且炒得非常均勻每粒飯都沾滿醬汁，加上又幾多配料，呢個炒飯都幾出色。最後以透心涼嘅紫薯雪糕作為總結。