一心製麵所 (已結業)

住咗响上環咁多年，日日返工放工都行過，今晚決定入去一試。舖面唔大，最多應該坐到15-20個人，得3張4人枱，其他都係bar 枱。當時夜晚8點左右，但入到去只見得兩個客（可能因為負評影響掛🤔），坐底睇mena 諗咗陣，兩姐弟一於都食老闆推薦嘅金帝王。可能淨番我哋一枱客，廚房好快手，點完餐一陣就有得食，第一啖當然要試湯啦，已經有好濃既蟹膏味，中間個心心原來都係蟹膏嚟，老闆教我哋溶落個湯度，咁樣就會更加濃，果然冇呃人，即刻濃到可以掛湯😍。之後就試麵，我就揀咗軟身，感覺到的確係有誠意（因為之前食附近熊x，叫軟身都仲係硬，完全好似你有你揀，佢有佢煮咁🤬）。另一最正就係糖心蛋，一黎好彈身，二黎仲好甜但又唔膩，三黎又橙又流心。塊叉燒就普普通通，好在冇燒焦味；白烚雞胸肉就起碼係滑身。論整體味道，環境，服務，都值得再去。下次去嘅話，一於試個蟹黃湯先，老闆就話同金帝王唔同之處就有蟹肉同白豚肉，但就冇咗糖心蛋同叉燒。