滾爺火鍋 (金巴利道)

營業中

休息中

今次去咗呢間餐廳試咗佢哋嘅藥膳花雕醉雞鍋，整體感覺幾特別，適合鍾意藥膳風味嘅朋友。餐廳環境簡潔，坐得舒服，同朋友傾足全餐都唔會受到打擾，三五知己、商業夥伴聊天開會的好地方，可以慢慢享受打邊爐嘅樂趣。藥膳花雕醉雞鍋（半隻雞），湯底帶有濃郁嘅藥膳香氣，花雕酒味比較突出，飲落暖身，適合鍾意酒香嘅朋友。雞肉份量足，雖然俾我地煮耐咗有少少偏老，但依然可以接受，藥材味同酒香結合得幾有特色，飲完之後成個人暖笠笠。美國安格斯板眼嘅肉質尚算唔錯，油脂分布均勻，輕輕一灼就可以食。雖然牛肉味唔算非常突出，但配搭藥膳湯底都幾夾，食落都算滿足。手打四寶丸分別係牛丸、蝦丸、鯪魚球同墨魚丸，每款都有唔同嘅口感。雖然彈牙度可以再好啲，但整體味道都算合格，特別係蝦丸同墨魚丸，食落都幾有鮮味。西洋菜嘅份量幾多，放入藥膳湯底煮一煮，吸晒湯汁嘅精華，食落都幾清甜，可以平衡返打邊爐嘅油膩感。萵筍幾爽脆，煮完之後仲keep到啲口感，食落幾清新。萵筍嘅清甜同藥膳湯底幾夾，食完之後口腔仲留有淡淡嘅清香，算係幾好嘅配菜。