四季甜品-外賣王

營業中

休息中

以前去雞地嗰邊都係為咗食B仔，自從B仔搬咗舖去鳳攸街嗰邊，先開始發掘嗰邊原來都有好多舖頭食嘢。前排網上介紹一間台式餐廳正正係果邊就去一試，但今次想評價下嘅反而係一間幾令人驚喜嘅甜品舖～四季甜品。食飽飯經過呢間糖水小店，本來覺得平平無奇，但唔小心比佢啲小食名吸引咗望多2眼，什麼冬陰功XO醬炒腸粉、黑松露意粉等，但礙於已經食飽，只好試試佢啲XO炒魚蛋同燒賣，10蚊一份有8粒，仲要睇住佢即炒，價性比冇得輸。比起其他甜品舖更加用心，不過等嘅時間就比較耐。甜品方面揀咗個芒果拿破崙，見唔係周圍有所以一試，上碟見到2小舊，雖然同menu張相數量吻合，但比想像中細舊，話晒都要差不多50蚊，慶幸酥皮咬落夠脆口，芒果肉都算厚身。值得加分係上碟時待應好有心咁附上一對手套方便直接用手拎住食。初次品嚐呢間小店感覺還好，不過下次再來會想試下意粉同腸粉，因為一路食甜品都見有唔少人叫嚟食，奈可今次食飽飯先發現呢間舖，唯有留待下次再品嚐。