蘇媽.蘇媽馬來西亞茶餐室

營業中

休息中

之前喺深水埗發現到蘇媽已經想幫襯，星期六同大佬經過，咁啱食晏時間都未需要排隊就入去一試。其實當日入座時九成滿，店內環境都幾有特色，不過座位距離比較窄，隔離有餸菜上檯時，都要避再避，如果唔係服務員再定會撞到你。餐牌都幾目不暇給，好多小食類，樣樣都想試，最後我哋order咗檳城白咖喱麵、仁噹牛肉撈麵、香炸滷肉卷、馬來西亞拉茶同檳城白咖啡。白咖喱麵啲餸唔多有豬紅、半隻烚蛋、白魚蛋、蝦同芽菜等。湯頭有少少辣油，但係個人食落就唔覺辣，白咖喱味唔太重，但係食落好夠味。麵係油麵，所以碗麵望落唔太大，但係食落夠晒飽肚。牛肉撈麵嘅牛肉都大大嚿，肉質淋得嚟有咬口，一啲都唔黐牙，薯仔味濃而甜，醬汁撈埋啲油麵滋味無窮。炸肉卷新鮮熱辣辣啱啱炸好，腐皮包住芋頭同肉醉，配上五香粉等唔同嘅香料，味道適中，外脆內軟，加上啲參巴醬，好惹味。白咖啡同拉茶我哋都點咗少甜，拉茶真係茶香無比，雖然茶面嘅泡泡唔夠綿密，但係飲落都順喉香滑。反而白咖啡嘅咖啡味冇咁重，偏向奶味多啲。當日原本仲想試吓其他小食，見其他食客點咗都好似細細碟/碗咁，不過我同大佬食完碗麵都10成飽，加埋個炸肉卷，個胃都已經填到滿一滿。相信會嚟多幾次試多幾款。