孖啡 (已結業)

Lunch time 於人流旺區, 三五朋友聚餐、傾計,心諗book cafe就一定安全（ 香港Cafe特色：食物唔會伏、食得入口、有梳化位坐,舒舒服服）。於是OpenRice隨意booked 一間價錢大眾化cafe。一入座場就留意到,餐廳玻璃窗和牆上貼咗獨特的剪影,玩味十足。加上宮廷風黑色水晶吊燈, 令整體裝潢充滿潮流。個人最鍾意裝飾有D吸睛嘅餐廳。意外收穫就係正午食lunch,人少少,環境較安靜,好適合傾計,哈哈。呢間cafe行西式簡單風格, 菜式同飲品選擇都多樣化。肉食獸、素食者,都可以搵到適合自己嘅菜式。今次我哋揀咗芝士焗吞拿魚天使麵、卡邦尼煙肉意大利粉、全日早餐、軟殼蟹黑松露意大利粉。總體而言,每位朋友都冇怨言、冇投訴, 即係款款都符合大眾水準、質素保證,完全冇伏！另外,不得不讚餐廳侍應服務有效率。Cafe設計較貼心,喺每張檯都有一粒掣方便有需要嘅每位客人。而我哋每一次一按掣,有位阿哥反應都好快咁服務,唔需要浪費我哋時間等待。呢點絕對值得讚賞！