Contrast

營業中

休息中

Bookmark咗好耐嘅人氣咖啡店，之前經過見到大排長龍所以最後無試到。襯住疫情呢排少人出街，平日十二點幾嚟到竟然真係唔使等位。主食有沙律、多士同意粉，甜品都有多款選擇。落單後幾分鐘就上咗飲品，分別係latte同matcha latte。Nutty咖啡同奶味好平衡，啱飲Matcha latte抹茶味香濃但唔會過份苦澀。香辣卡邦尼大蝦扁意粉賣相好靚，大蝦爽口。扁意粉沾滿卡邦尼汁而且煮得剛好，仍然帶點嚼勁，食落有蛋同煙肉香，但因為加咗辣油所以稍為油膩咗啲。窩夫應該係呢間cafe嘅招牌甜品，除咗有竹炭糯米窩夫，最近仲出咗髒髒Tiramisu窩夫。咖啡味窩夫表面灑上Vahlrona可可粉，Mascarpone忌廉畀得好慷慨配料有自家製牛奶雪條、honey comb同朱古力消化餅。咖啡窩夫烤得外脆內軟，淋上咖啡酒糖漿配埋Mascarpone忌廉一齊食好好味自家製牛奶雪條比較淡味，牛奶味唔突出，而且甜度屬於微糖，可能想走健康路線？但夏天食呢條雪條感覺幾消暑嘅。整體嚟講食物質素唔錯，咖啡好飲，價錢亦好合理。下次會再嚟飲咖啡食窩夫。