三日月

營業中

休息中

見疫情緩和即刻搵餐廳食，今次想食鐵板餐所以就book咗三日月，叫咗個好豐富嘅三日月A5宮崎和牛鵝肝帝王虎蝦一人前鐵板餐，就咁睇餐單都見到好多嘢食。前菜有三款，分別係好厚身嘅豆腐、茄子，同埋雞肉刺身，第一次食雞肉刺身，帶煙熏味，雖然唔係好食得出係雞肉，但係都好好食。刺身有吞拿魚、油甘魚，蝦刺身。最好味係個油甘魚，一放入口成個口腔都係油脂，食得出係好新鮮嘅魚生。接着就有海葡萄沙律可以過吓味蕾嘅味道，再食埋個茶碗蒸暖一暖個胃。阿拉斯加銀鱈魚個賣相好唔錯，首先食咗塊煎香左嘅魚皮，再食塊銀鱈魚，超濃郁嘅魚油味。帝王虎蝦充滿驚喜，蝦身好巨型，師傅再用蝦膏煎香做汁放返上蝦身上面，每食一口都會覺得好感動，係最好食嘅其中一樣。香煎鵝肝配鐵板燒日本野菜，個鵝肝煎到好香，熟度啱啱好，因為油脂比較豐富所以配野菜就剛剛好。去到最後，A4鹿兒島和牛薄燒卷係一款味道比較強烈嘅牛，我都好鍾意牛味重嘅肉，每一樣菜式我都覺得好好味。已經食咗好多樣嘢，最後仲有鐵板炒飯入面有櫻花蝦同埋有啲魚仔，最鍾意係佢啲炒飯炒到好乾身一粒粒，之後仲可以伴湯食。食完之後就飲埋佢個味噌湯。今日甜品係雲呢拿雪糕，食完覺得好滿足。