黑木亭居酒屋 (金馬倫道)

今日行過尖沙咀，睇到哩間餐廳出咗好多新嘢，咁試試啦。晚市餐廳好旺，基本上全滿，唔想等位一定要book定位先。藍碟花佛手柑熊茶，呢杯熊茶真係好得意，藍碟花嘅藍色漸層好靚，打卡一流。佛手柑嘅清香好突出，飲落去有淡淡柑橘味，唔會太甜，好refreshing。北海道士多啤梨牛乳乳酸，杯野粉紅色好少女心，入口係超濃嘅士多啤梨味。乳酸帶微微酸味，平衡返甜度，唔錯。草莓南蠻醬吉列炸蝦, 蝦肉超大一隻，差唔多有巴掌大。吉列蝦炸得金黃香脆，蝦肉鮮甜彈牙爽口。南蠻醬好有驚喜，酸酸甜甜奶味濃郁，同炸物好夾。千島牛油果軟殼蟹卷，卷好豐富，內裡軟殼蟹炸得酥脆，上面鋪滿牛油果，仲添加咗日式千島醬汁調味。一啖一件好滿足，口感從脆口到creamy，非常豐富。三味鐵板A5和牛鵝肝，一份有3款肉，A5和牛，鵝肝同大蔥蒜蓉和牛。A5和牛雪花分明，煎到半熟，簡直入口即溶。鵝肝煎得外脆內軟，搭配埋多士同蘋果片一齊食用，味道層次好豐富。最得意係大蔥蒜蓉和牛，和牛軟嫩，大蔥清甜，食到停唔落口。搭配嘅蒜蓉汁好有特色，微酸帶少少辣味，好似日本和中國醬汁啲fusion版，好得意。