勝香園

營業中

休息中

之前有次為咗幫襯勝香園而特登入上環，好可惜個次無開鋪。第二次11點幾左右去上環，終於有開啦！不過真係好受歡迎，當時已經有一條長龍排緊。餐廳係大牌檔形式經營，自己比較少機會幫襯大牌檔，所以都幾期待。地方比較淺窄，搭枱都預咗，但對我而言食物質素比較重要。-蕃茄碎牛炒蛋通粉湯底呈蕃茄鮮紅色，睇得出用料幾足，入口鮮甜。炒蛋幾有住家感覺，厚身帶點彈性，平凡但顯功架。碎牛都唔錯，牛味唔會完全被湯底嘅蕃茄味掩蓋，依然食到牛肉香。-牛油檸檬汁蜜糖脆脆口感真係好脆，不過同我想像中會外脆內軟嘅口感有少少分別。包身整體係偏硬，牛油味唔算好突出，主要被檸檬同蜜糖味蓋過。檸檬汁配蜜糖嘅調味的確幾特別，酸酸甜甜夠醒胃，值得一試。