古琴雅苑 (利舞臺廣場)

營業中

休息中

都好似好耐冇食京菜，今日嚟到呢間新開嘅銅鑼灣分店，今次三個人食飯可以食多啲唔同嘅菜式，裝修風格都幾有格調，傳統中帶有文化氣質。北京填鴨係佢哋嘅招牌菜，所以嗌咗半隻食，烤鴨皮脆肉滑，食落好似有一陣陣嘅果木香，配料上有少見嘅哈密瓜，包住一齊食嘅時候，有咸有甜層次豐富。風味松子魚，呢個係我最鍾意食嘅菜式之一，因為喺屋企絕對煮唔到，魚肉炸得金黃酥脆，加上酸甜汁，食落好開胃。南翔小籠包，皮薄汁多，中間肉汁溫度保持得好好，食嘅時候真係小心辣到個口。蜜汁燒火方，呢個菜式有驚喜，金華火腿薄切後煮淋，本身嘅鹹味減少好多，再加上蜜汁，鹹甜嘅感覺加上白麵包一齊食，軟綿綿味道層次又豐富。